“နွားနောက်ကြီးနှင့်တောခွေးများ”(စ/ဆုံး)

“နွားနောက်ကြီးနှင့်တောခွေးများ”(စ/ဆုံး)

=================================

နွေဦး၏လေရူးသည် သစ်တောထဲ အချိန်မှရွေး ဝင်ရောက်မွှေနှောက်လာတတ်သည်။ လေထဲတွင် ရွက်ဝါခြောက်များ ပလူပျံလာကြသည်။ . သစ်ရွက်ကြွေသံကို ကြားရတိုင်း သူတို့၏ဝမ်းဗိုက်တွေက ပို၍ဆာလောင်မွတ်သိပ်လာကြသည်။

ဆောင်းနှောင်းသမယက မွေးပေါက်ထားသော သားသမီးများ၏အစာတောင်းသံကြောင့်လည်း သားသည်အမေများသည် ပို၍ဒေါသကြီးလာကြသည်။ နို့ဆွဲလွန်းသော ကလေးငယ်များကို ဖယ်ရှားတွန်းကန်ပစ်သံ၊ ကလေးများ အော်သံ၊ မိခင်များ ခြိမ်းခြောက်မာန်ဖီသံတို့နှင့် သားရဲတွင်းသည် အမြဲဆူညံလာတော့သည်။

ဂိမန္တ၏တောအလုံးသည် အောက်ခြေရှင်းနေသဖြင့် မြင်ကွင်းကပိုကျယ်လာသည်။ ရွက်ကြွေရွက်ခြောက်များပေါ် ပြေးသွားသောတိရစ္ဆာန်ကောင်တစ်ကောင်၏ခြေသံကို ဝေးဝေးကပင်ကြားလာရသည်၊

မြေမှထွက်သော ပုတတ်စာနှင့် သစ်ဥသစ်ဖုများကို တူးဖော်စားနေသော သားကောင် အမဲကောင်များကလည်း ပေါများလာသည်။နေ့၌ထွက်သော သားကောင်ဖြစ်စေ၊ ညဉ့်၌ထွက်သော သားကောင်ဖြစ်စေ နွေလ၌ ရွက်ကြွေတောထဲ သားကောင်လိုက်ရသည်မှာပို၍လွယ်ကူလာလေသည်။

နေ့တွင် နေရောင်ခြည်နှင့် မြင်နိုင်သလို ညဉ့်အခါမှာလည်းသူတို့၏သားကောင်များကို ကြယ်ရောင်လရောင်များက ညွှန်ပြအသိပေးတတ်ကြသည်။ မည်မျှ မှောင်မည်းသိပ်သည်းနေသော ညဉ့်ယံ၌ဖြစ်စေအောက်ခြေရှင်းနေသော ရွက်ကြွေတောထဲပြေးသွားသော သားကောင်ကိုသူတို့သည် အဝေးကြီးကပင် မြင်နိုင်ကြသည်။

ထို့ကြောင့် ဤလိုပူပြင်းခြောက်သွေ့သော နွေရာသီကာလတစ်လျှောက်တွင် သူတို့သည် သားကောင်လိုက်ခြင်းကို ညဉ့်အခါသာ ဆင်နွှဲချင်ကြသည်။ လိုက်ဖမ်း၍ရသော သားကောင်ကို ညဉ့်၌သာအကုန်အစင်
စားကာ နေ့တွင် သူတို့၏ကမ္ဘာဖြစ်သော သားရဲတွင်းထဲ ဝင်နားနေချင်ကြသည်။

သားရဲမြေတွင်းတွေမှာ နေ့တွင်အေး၍ ညတွင်နွေးသည်။ ဆောင်းနှင့်မိုးတွင် နွေးထွေး၍ နွေလတွင်အေးမြသည်။

ထို့ကြောင့်လည်း ညကသားကောင်ရ၍ ဗိုက်ဖြည့်ထားသောသူတို့သည် နေ့တွင် သားရဲတွင်းထဲ၌
အိပ်စက်၍လည်းကောင်း၊ မှေးယစ်ဇိမ်ခံ၍လည်းကောင်း၊ အထီးသည်အမအနီး၌လည်းကောင်း၊ အမသည် အထီးအနား၌လည်းကောင်း ကလူကျီစယ်ကာ ကာမဂုဏ်အာရုံကို ခံစားတတ်ကြသည်။

သူတို့သည် အစာအာဟာရ၌‘ ချင်ခြင်း တပ်မက်ခြင်းကြီးမားကြသလို ကာမဂုဏ်အာရုံ အတွေ့အထိ၌လည်း အလိုရမ္မက်ကြီးမားကြသည်။

ထို့ကြောင့် မိတ်လိုက်ခြင်း၊ သားမွေးခြင်းတို့မှာ သူတို့အတွက်ရာသီမရွေး၊ အခါမရွေး အကာလိကောပင်။

ဤသည့်အကြောင်းများကြောင့်လည်း သူတို့သည် သူတို့၏ ကမ္ဘာဖြစ်သော သားရဲတွင်းကို နှစ်နှစ်တစ်ခါ၊ သုံးနှစ်တစ်ခါ ပြောင်းရွှေ့ချဲ့ထွင်ကြရသည်။ ချဲ့ထွင်၍မရလျှင် ပြောင်းရွှေ့ကြရသည်။

ပြောင်းရွှေ့သောအခါမှာလည်း တစ်ကောင်စ နှစ်ကောင်စ မဟုတ်၊ တစ်သိုက်တစ်မြုံတစ်ထွေး အစုအဝေးနှင့်ပြောင်းကြသည်။

သူတို့နေရာသစ်သို့-ပြောင်းရွှေ့ချိန်တွင် အုပ်စုထဲမှ လိမ္မာပါးနပ်ပြီးသားရဲတွင်းဖောက်လုပ်ခြင်း၌ အတွေ့ အကြုံရင့်ကျက်သော ခေါင်းဆောင်ဖြစ်သူ တစ်ကောင် သို့မဟုတ် နှစ်ကောင်ကို ဦးစွာလွှတ်ပြီး အန္တရာယ်ကင်းမှ အုပ်စုလိုက် ပြောင်းရွှေ့တတ်ကြသည်။

သားရဲတွင်းအသစ်၌မူသူတို့သည် ထင်သလိုပျော်ပါးကြပြီး အမများက တစ်ခါသားပေါက်လျှင်ခြောက်ကောင် ခုနစ်ကောင်ထိ ပေါက်တတ်ကြသည်။ ဤလို သားမွေးသားပေါက်ကောင်းသဖြင့်လည်း အမများတွင် နို့သီးခြောက်စုံ ခုနစ်စုံပါရြှိခင်းဖြစ်သည်။

အမများ သားပေါက်ချိန်တွင် သားရဲတွင်းဝန်းကျင်သည် ကလေးညည်းသံများနှင့် ဆူညံနေတတ်လေသည်။

သူတို့သည် အလိုရမ္မက်ကြီးခြင်း၊ သားစားကြူးခြင်း၊ ရန်လိုခြင်း၊တိုက်ခိုက်ရဲခြင်းတို့ကြောင့်လည်း အမျိုးလေးပါးဖြစ်သော ခွေး၊ ခွေးအ၊မြေခွေးတို့က သူတို့ကိုကြောက်ကြသည်။ အသံကြားကတည်းက ဝေးဝေးသို့ရှောင်ရှားကြသည်။ သူတို့ကားအမျိုးကိုလည်း ငဲ့ညှာထောက်ထားကြသူမဟုတ်။သူတို့ ဝမ်းမီးတောက်လာလျှင်အမျိူးတူညီအကိုတော်များကိုမဆိုထားနှင့် အချင်းချင်းပင် ကိုက်စားတတ်ကြသည်။

ထို့ကြောင့် အမများသည် သားပေါက်ချိန်၌ အထီးများကိုစိတ်မချသဖြင့် အခါမလပ် စောင့်ကြည့်နေတတ်ကြသည်။ သားကောင်လိုက်ရာ၌ပင် စိတ်မဖြောင့်နိုင်ကြ၊ သားကောင်လိုက်ရန် သားရဲတွင်းထဲက အတူ
ထွက်ခွာလာကြသော အထီးများသည် အမများမရိပ်မိအောင် သားရဲတွင်းထဲပြန်လှည့်ကာ ကလေးသူငယ်များကို ကိုက်စား ပစ်တတ်ကြသဖြင့်ဖြစ်သည်။..

ထိုသို့ ကလေးများကိုပြန်စားသော အထီးများကို ဖမ်းမိသွားလျှင်သားသည်အမေများသည် ထိုအထီးအားဝိုင်းကိုက်ကာ သားရဲတွင်းမှ နှင်ထုတ်မောင်းလွှတ်လိုက်ကြလေသည်။

သို့သော် ကြာရှည်လေးပင်စွာမဟုတ်။ အမများ အလိုရမ္မက်ကြီးနေချိန်တွင် အထီးများသည် သားရဲ
တွင်းနားပြန်လာပြီး အမများနှင့်ပျော်ပါးကာ သားရဲတွင်းထဲ ဝင်ရောက်လာကြပြန်လေ၏။

ဤသို့ အလိုရမ္မက်ကြီးခြင်း၊ သားစားကြူးခြင်း၊ ရန်လိုခြင်း၊ တိုက်ခိုက်ရဲခြင်းတို့ကြောင့်လည်း “တောခွေး”ဆိုလျှင် မည်သည့်တောတိရစ္ဆာန်မဆို အသံကြားရုံနှင့် လန့်ပြေးတတ်ကြသည်။

သူတို့ကလည်း သားကောင်ဆိုလျှင် သမင်၊ ဒရယ်၊ ချေငယ်၊ စိုင်၊ ဆတ်တို့လို အင်အားနည်းတိရစ္ဆာန်များကို မဆိုထားနှင့် ဝက်ဝံ၊ ပြောင်၊ နွားနောက်၊ ကျွဲ၊ ကျားနှင့် ကုန်းနေသတ္တဝါထဲတွင် ကိုယ်ခန္ဓာအကြီးမားဆုံးနှင့် ခွန်အားဗလအကြီးမားဆုံးဖြစ်သော တောဆင်ကြီးများကိုပင် လိုက်လံဖမ်းစားတတ်ကြလေသည်။

တောရိုင်းတိရစ္ဆာန်ကြီးများကို သူတို့က ဖမ်းဆီးစားသောက်နိုင်ကြခြင်းမှာ သူတို့အား သဘာဝကပေးထားသော သူတို့၏ ကျင်ငယ်ရေဆေးတစ်ပါးကြောင့်လည်း ဖြစ်လေသည်။တောခွေးသေးရည် မျက်စိထဲဝင်မိလျှင်မည်သည့်တောတိရစ္ဆာန်မဆို ရုတ်တရက် ခဏတော့ မျက်စိမမြင်ဘဲ ကန်းသွားတတ်ကြသည်။

ဤသည်ကို အခွင့်ကောင်းယူကာ တောခွေးများသည် သူတို့ထက်အဆပေါင်းများစွာ ခွန်အားဗလကြီးမားသော တောတိရစ္ဆာန်များကိုဖမ်းစားသတ်ဖြတ်နေကြခြင်း ဖြစ်လေသည်။

နွေရင့်ရက်၏ လသာညတစ်ညတွင် တောခွေးအုပ်တစ်အုပ်သည်အမဲလိုက်ရန် သားရဲတွင်းထဲက ထွက်လာကြလေသည်။

တောခွေးထီးများနှင့်အတူ တောခွေးမများလည်း သားရဲတွင်းထဲမှထွက်လာကြသောအခါ နို့စို့အရွယ်သာရှိသေးသော တောခွေးငယ်များကလည်း မိခင်၏အနံ့ကိုခံကာ သားရဲတွင်းမှ ထွက်လိုက်ပါလာကြသည်။

အရွယ်မရောက်ကြသေးသော ကလေးငယ်များကို သားရဲတွင်းထဲမိခင်များက ပြန်သွင်းကြ၏။ ချော့မြူ၍ပြန်သွင်းနေကြသလို ခြိမ်းခြောက်၍လည်း ပြန်သွင်းကြသည်။

နွေရင့်ရက်ဖြစ်သဖြင့် စမ်းချောင်းများ ခြောက်
ခန်းသွားကြရာ သူတို့၏ အမဲလိုက်ရပ်ဝန်းဒေသမှာ ပိုမိုကျယ်ပြန့်လာသည်။ ဆောင်းကာလကလို စမ်းချောင်းနားရေသောက်ရန်လာသောသားကောင်ကို အလွယ်တကူ ဖမ်းယူစားသောက်နိုင်ကြခြင်း မရှိသည်မှာရက်သတ္တပတ်ပေါင်းများစွာ ကြာခဲ့ပြီ။ထို့ကြောင့် သူတို့အားလုံးသည် ဝမ်းမီးတောက်လောင်လာ၍
‘ဒေါသပိုကြီးလာကြသည်။

မိခင်များအစာရေစာမဝမလင်ရှိကြသောအခါမိခင်များ၏နို့ရည်ပေါ် အမှီသဟဲပြုနေကြရသော
ပေါက်စနလေးများမှာလည်း တစ်နေ့မှ ဝမ်းဝသည်မရှိတော့။

ထိုသို့ဝမ်းမဝလေ မိခင်၏နို့ကို မလွှတ်တမ်းခဲထားလေ စို့လေပင်ကလေးနို့စွဲ၍ ဝမ်းဗိုက်ပိုဟာလာသော တောခွေးမတွေမှာလည်းဒေါသပိုကြီးလာကြသည်။ အထီးများ အလျှိုအလျှို ထွက်သွားကြပြီဖြစ်သော်လည်း အမများမှာ ကလေးများကြောင့် နှောင့်နှေးကြန့်ကြာကာသားရဲတွင်းထဲမှ လွယ်လွယ်နှင့်ထွက်မရ ဖြစ်နေကြသည်။

အနံ့ခံကောင်းသော ကလေးများသည် မိခင်နောက်က လိုက်လာကြရာ ခေါင်းနှင့်ဝှေ့ လက်နှင့်ပုတ်ပြီး သားရဲတွင်းထဲ ပြန်သွင်းကြရ၏။

အရွယ်မရောက်သေးသော သူတို့၏ကလေးငယ်များကို အပြင်သားရဲတွင်းနှုတ်ခမ်းဝတွင်လည်း မထားခဲ့ရဲသော တောခွေးမတွေမှာ ကလေးတွေကြောင့် သားကောင်လိုက် နောက်ကျနေကြသည်။

စိတ်မရှည်သော တောခွေးမကြီးတစ်ကောင်သည် သားရဲတွင်းဝမှလေးငါးဆယ်လှမ်းထိ ထွက်လိုက်ပါလာသော သားဆိုးတစ်ကောင်ကိုကုပ်မှကိုက်ချီကာ သားရဲတွင်းဝနား လွှင့်ပစ်လိုက်သည်။ ထိုတောခွေးမ၏သားအော်သံကြောင့် တခြားသောတောခွေးမများပါ အထိတ်တလန့်ဖြစ်ကုန်ကြသည်။

ဤလို အစာရေစာ ရှားပါးငတ်မွတ်နေချိန်တွင်
တောခွေးထီးများသည် သားကောင်လိုက်ရန် ထွက်သွားသလိုလိုနှင့် သားရဲတွင်းထဲ
ပြန်ပြီး ကလေးများကို ကိုက်သတ်စားနေပြီအထင်
နှင့် အသံကြားရာမှခြေလှမ်းတုံ့ပြီး ပြန်ပြေးရောက်လာကြသည်။

သားရဲတွင်းနားရောက်မှ သားသည်မိခင်တစ်ကောင်နှင့် သူ့သား၏အဖြစ်ကိုမြင်ရကာ သားရဲတွင်းနားမှ ပြန်သွားကြလေသည်။ သားဆိုးအမေလိုဖြစ်နေသော တောခွေးမကြီးသည် သူ့သားငယ်အား သားရဲတွင်းနှုတ်ခမ်းနားပေါ် လွှင့်ပစ်ထားပြီး ရုတ်ခြည်းကိုယ်ရောင်ဖျောက်ပြေးသွားသည်။

သို့သော် ဝေးဝေးလံလံသို့ကားမဟုတ်၊ သူ့သားသည် သားရဲတွင်းထဲသို့ ပြန်ဝင်မဝင် တစ်နေရာက ချောင်းကြည့်နေသေးသည်။ မိခင်ကြီးကကိုက်လွှင့်ပစ်ထားခြင်းခံရသော တောခွေးငယ်သည် မိခင်ကြီး၏အနံ့နှင့်
မိခင်ကြီးကို မမြင်ရသောအခါ အန္တရာယ်ကိုကြောက်ရွံ့ပြီး သားရဲတွင်းထဲပြန်ဝင်ပြေးလေ၏။

သို့မှသာ တောခွေးမကြီးသည်လည်း သူ့အဖော်များနောက်ကိုသားကောင်လိုက်ရန် စိတ်ချလက်ချ ပြေးလာရတော့သည်။

လရောင်ဖျန်းထားသော ရွက်ကြွေသစ်ခြောက်တောထဲတွင် တောခွေးများသည် တစ်ကောင်နှင့်တစ်ကောင် ညင်းညင်းညံ့ညံ့ အသံပေးကာသားကောင်ကိုရှာဖွေလျက် ရှိကြသည်။

သူတို့သည် သားကောင်လိုက်ရာ၌ ခွေး၊ ခွေးအများလို အူခြင်းဟောင်ခြင်းကိုမပြုကြ၊ ညင်းညင်းညံ့ညံ့ ညည်းတွားသံကို ပြုကာသာတစ်ကောင်နှင့်တစ်ကောင် ဆက်သွယ်ကြသည်။ သူတို့သည် သားရဲတွင်းနှင့် မိုင်ပေါင်းများစွာ အဝေးထိသွားကာ သားကောင်ကိုရှာကြသည်။

သို့သော် ဤတောဤတောင် တစ်ဝိုက်တွင် လွန်ခဲ့သော ရက်သတ္တပတ်ခန့်က တောမီးကြီးလောင်သွားသဖြင့် သားကောင်များကို တော်တော်နှင့်ရှာမရ။ ထိုအခါ သူတို့သည် သားကောင်များ ရနိုင်သောနေရာထိဝေးဝေးသို့ ထွက်ခွာလာကြရပြန်လေသည်။ .

သည်လိုနှင့် သူတို့သည် သန်းခေါင်ယံ၌ နွားနောက်ကြီး တစ်ကောင်ကိုတွေ့ကြရလေသည်။ ဝမ်းမီးတောက်၍တောခွေးအုပ်သည် နွားနောက်ကြီးကို ဝိုင်းလိုက်ကြသည်။

သူတို့သည် သားကောင်လိုက်ရာ၌ ရဲရင့်ကျွမ်းကျင်ကြသူများဖြစ်ရာ မည်သူသည် ရှေ့ကဆီး၍ မည်သူမည်သူများက ဘေးနှစ်ဖက်တွင်နေရာယူကြရမည် ဆိုသည်ကို တိုင်ပင်ထားသလို အကွက်ကျကျ
အသင့်ဖြစ်နေကြသည်။

ထို့ကြောင့် တောခွေးအုပ်ကြီးသည် နွားနောက်ကြီးအားရှေ့က ဆီးသည့်အကောင်ကဆီး၊ ဘေးက ဝိုင်းသည့်အကောင်ကဝိုင်း၊နောက်က လိုက်သည့်အကောင်ကလိုက်နှင့် တစ်ကောင်ဆင်းတစ်ကောင်တက် ဝိုင်းလိုက်လာကြသည်။

ရှေ့ကပြေးဆီးသော တောခွေးကြီးတစ်ကောင်သည် နွားနောက်ကြီးပြေးလာလိမ့်မည်ဟုထင်သော လမ်းကဖြတ်ပြီး ကိုင်းနေသောသစ်ပင်တစ်ပင်ပေါ်ပြေးတက်ကာ ကြိုစောင့်နေသည်။ သူတို့သည်မတ်နေသော
သစ်ပင်ပေါ်သာ မတက်နိုင်ကြသော်လည်း ကိုင်းနေသောသစ်ပင်များကိုမူအားလုံးတက်နိုင်ကြသည်။

သည်လိုနှင့် နွားနောက်ကြီးက သူတက်နေသော သစ်ပင်အောက်ရောက်လာသောအခါ နွားနောက်ကြီး၏ခေါင်းပေါ် သေးပန်းချလိုက်သည်။

တောခွေးပန်းချလိုက်သော သေးရည်က နွားနောက်ကြီး၏ မျက်စိထဲဝင်သွားသောအခါ ရုတ်တရက်ပြာဝေပြီး အမြင်ကန်းသွားသည်။

ထိုအချိန်တွင် သေးပန်းချလိုက်သော် တောခွေးကြီးသည် နွားနောက်ကြီး၏မျက်လုံးကို ဖောက်ကိုက်ရန် နွားနောတ်ကြီး ဦးကင်းပေါ်ခုန်ချလိုက်သည်။ နွားနောက်ကြီးမှာ မျက်စိစပ်ပြီး အတင်းရုန်းကန်နေစဉ်
သူ့ခေါင်းပေါ်ခုန်ချလိုက်သော တောခွေးကြီးအား ဦးချိုနှင့် တအားဝှေ့ကော်လိုက်ရာ တောခွေးကြီးမှာဗိုက်ပွင့်ပြီး မြေကြီးပေါ်ဝုန်းခနဲပြုတ်ကျလာသည်။

မြေကြီးပေါ်တွင် တကိန်ကိန်အော်မြည် ညည်းတွားနေသောတောခွေးကြီးကို နွားနောက်ကြီးက သွေးရူးသွေးတန်းနှင့် မမြင်မစမ်း တိုးဝှေ့ထိုးခတ်နေချိန်မှာပင် သူ့နောက်နှင့်ဘေးက ပန်းလိုက်လာကြသောခွေးအုပ်က နွားနောက်ကြီးနားရောက်လာပြီးဝိုင်းထားလိုက်ကြသည်။

တောခွေးများဝိုင်းထားခြင်းကို ခံနေရသော နွားနောက်ကြီးသည်မည်းမည်းမြင်ရာကို ဝှေ့ခတ်နေ၏။ ထိုစဉ် တောခွေးများသည် စုတ်ဖွားဖွားဖြစ်နေသော သူတို့၏အမြီးများကို အင်္ဂါအောက်ကုပ်သွင်းလိုက်ကာ
အမြီးကိုသေးရည်ဆွတ်ပြီး နွားနောက်ကြီး၏မျက်နှာကို ဝိုင်းပက်ကြသည်။

စောစောကတောခွေးကြီး သေးရည်ထိမှန်ထားသဖြင့် မှုန်ဝါးဝါးဖြစ်နေသော နွားနောက်ကြီး၏မျက်လုံးထဲ နောက်ထပ်တောခွေးသေးရည်တွေ ထပ်ဝင်လာပြန်သောအခါ နွားနောက်ကြီးမှာ လုံးဝမျက်စိမမြင်ဘဲဖြစ်သွားလေ၏။

ဤသည်ကို အခွင့်ကောင်းယူကာ တောခွေးများသည် နွားနောက်ကြီးကိုဝင်ဆွဲကြ၏။ ကိုယ်ပေါ်တွင် ဒဏ်ရာဒဏ်ချက်တွေနှင့် ပြည့်နှက်နေသော တိုက်ပွဲသူရဲကောင်း တောခွေးတစ်ကောင်သည် နွားနောက်ကြီး၏ဇက်ပေါ် ခွတက်ကာ မျက်လုံးတစ်ဖက်ကို ဖောက်ပစ်လေသည်။

ထိုတောခွေးကြီးက နွားနောက်ကြီး၏ မျက်လုံးတစ်ဖက်ကို ကိုက်ဖောက်ပစ်လိုက်သည်ကို မြင်သောအခါ ရန်လိုနေသော ခွေးမကြီးတစ်ကောင်ကလည်း နွားနောက်ကြီး၏ဇက်ပေါ် ခုန်တက်ကာ နောက်
မျက်လုံးတစ်ဖက်ကို ကိုက်ဖောက်ပစ်လိုက်ပြန်၏။

သည်လိုနှင့်တောခွေးများသည် သွေးရူးသွေးတန်းပြေးနေသောနွားနောက်ကြီး၏ ကိုယ်ပေါ်ကို သူ့ထက်ငါဦးခုန်တက်ကြကာ- ဒွာအူတွေကို ကိုက်ဆွဲသူကဆွဲ၊ ဝမ်းဗိုက်ကို ဖောက်ကိုက်သူကဖောက်ကိုက်နှင့် `နွားနောက်ကြီးကို ဝိုင်းဝန်းတိုက်ခိုက်ကြသည်။

နွားနောက်ကြီးဦးချိုနှင့် ခွေ့မိသော တောခွေးသုံးလေးကောင်ကမူတအိုင်အိုင်အော်ကာ နောက်မှာကျန်နေခဲ့ကြ၏။ သို့သော် ကျန်တောခွေးများကမူ ဒဏ်ရာအနာတရနှင့် ကျန်ရစ်ခဲ့ကြသော အဖော်တောခွေးများကို လုံးဝပြန်လှည့်မကြည့်အားကြ၊ နွားနောက်ကြီး ပြေးရာနောက်ကိုသာဝိုင်းလိုက် ဝိုင်းကိုက်ပြီး ပါသွားကြ၏။

မကြာခင်မှာပင် နွားနောက်ကြီးသည် မြေပြင်၌ဗိုင်းဗိုင်းလဲကာ.ဆန့်ငင်ဆန့်ငင်နှင့် အသက်ပျောက်သွားလေသည်။

ထိုအခါ တောခွေးများသည် နွားနောက်ကြီး၏ ကိုယ်ခန္ဓာတစ်ခုလုံးကို တစ်ညလုံး ကိုက်ဝါးဖဲ့စားကြ၏။ ထိုအချိန်တွင် စောစောက နွားနောက်ကြီးဦးချိုနှင့် အခွေ့အခတ်ခံထားရသော ဒဏ်ရာရတောခွေးများကမူ တအင့်အင့်အော်ညည်းအသက်ငင်လျက်ပင် ရှိနေကြလေသည်။

သို့သော် ဤတိုက်ပွဲတွင် ဒဏ်ရာအနာတရမဖြစ်ဘဲ အောင်သေအောင်သား စားနေကြသော တောခွေးများကမူ သူတို့၏ ဝမ်းဗိုက်ထဲနွားနောက်သားတွေ – ပြည့်သွားသောအခါ ဗိုက်လေးလေးနှင့် သူတို့၏သားရဲတွင်းရှိရာသို့ ပြန်လာကြလေသည်။

(၁၉၈၉ ခုနှစ်၊ မေလ၊ ချယ်ရီမဂ္ဂဇင်း)

ရေးသားသူ-ဖိုးကျော့

#crd