“အစိမ်းမ ချစ်သူ”(စ/ဆုံး)
——————————-
…… မြလှိုင် တစ်ယောက်
ဌေးမော်ကို ချစ်နေမိတာကြာပြီ။
ဒါပေမဲ့ သူက လူရိုးလူအ တစ်ယောက်မို့
ဖွင့်မပြောရဲ။ သူ ဖွင့်ပြောဖို့
ကြိုးစားခဲ့တဲ့ နေ့တွေကလည်း
အကြိမ်ကြိမ်ပါပဲ။ နွားကျောင်းရာကနေ
ဌေးမော်တို့ ပျိုမေတစ်စု
ရေခပ်ထွက်ချိန်အမှီလာရတာကအမော။
ဒါပေမဲ့ ဌေးမော်နဲ့တွေ့တိုင်း
သူဘာမှမပြောဖြစ်ဘဲ လှည့်ပြန်ခဲ့တဲ့
နေ့တွေသာ များတယ်။
ကြာတော့ သူ့ကိုသူ အားမရ
ဖြစ်လာမိတယ်။ ဘာလို့ ဖွင့်မပြောရဲ
ရတာလဲ ဆိုပြီးတော့ပေါ့။
အဲလိုနဲ့ တစ်နေ့မှာ သူ ဌေးမော်ကို
မဖြစ် ဖြစ်အောက်ပြောမယ်ဆိုတဲ့
ဆုံးဖြတ်ချက်ချလိုက်ပါရော။
အဲဒီနေ့က မြလှိုင် သတ္တိတွေမွေးပြီး
နွားကျောင်းရာကနေပြန်လာချိန်
ဌေးမော်ကလည်း ရေခပ်ထွက်လာချိန်နဲ့
ကြုံကြတယ်။
တိုက်တိုက်ဆိုင်ဆိုင် မြလှိုင်
ဖွင့်ပြောဖို့ အားခဲထားတဲ့နေ့မှ
ဌေးမော်ရေခပ်လာတာ တစ်ယောက်တည်း
ဖြစ်နေတယ်။ သူတို့ရွာမှာက
သောက်ရေကို ရွာအပြင်ဘက်မှာ
လာခပ်ရတာ။
အဲတော့ မြလှိုင်အတွက်
အခွင့်ကောင်းပေါ့။
မြလှိုင်တစ်ယောက်
မြန်ဆန်နေတဲ့ ရင်ခုန်နှုန်းတွေကို
ထိန်းချုပ်ပြီး ရေအိုးရွက်ကာ
သွားနေတဲ့ ဌေးမော်အနောက်ကို
ခပ်မြန်မြန်လေး လိုက်သွားတယ်။
“ဌေးမော်…ခဏနေပါဦးဟ၊
ငါနင့်ကို ပြောစရာရှိလို့”
မြလှိုင် နည်းနည်းလေး
အံ့သြသွားမိတယ်။
တကယ်တော့ သူ ဌေးမော်လို့
ထင်ပြီး လိုက်ခေါ်တဲ့ မိန်းကလေးက
ဌေးမော် မဟုတ်ပါဘူး။
တစ်ခြားမိန်းကလေးတစ်ယောက်
ဖြစ်နေတယ်။
ဒါကြောင့် မြလှိုင်ဟာ
ကြောင်တောင်တောင်ဖြစ်သွားပြီး
ရပ်ကြည့်နေမိတယ်။
မြလှိုင် မြင်နေရတဲ့ သူစိမ်း
မိန်းကလေးဟာ အတော်လှပါတယ်။
သူချစ်နေတဲ့ ဌေးမော်နဲ့က
ဆီနဲ့ရေလိုပါပဲ။
မြလှိုင်လည်း အဲဒီမိန်းကလေးကို
တစ်ခါမှ မမြင်ဖူးတာနဲ့-
“ဪ..လူမှားသွားတယ်၊
ဒါနဲ့ ဒီက အစ်မက ဘယ်ကလဲ”
” ရွှေညောင်ပင်ရွာကပါ”
” ဪ… ရွှေညောင်ပင်ရွာက
ဒီအထိ ရေလာခပ်တာလား”
“မဟုတ်ပါဘူး၊ ဟိုးရှေ့နားမှာ
ကျွန်မတို့ ယာခင်းရှိတယ်လေ၊
အဲဒါ ယာခင်းလာရင်း သောက်ရေ
လာခပ်တာပါ”
သူစိမ်းမိန်းကလေးက ရုပ်လည်း
လှသလို ဖော်ဖော် ရွေရွေလည်း
ဆက်ဆံတတ်လေတော့
အချိန်အတိုလေးအတွင်းမှာပဲ
မြလှိုင်နဲ့ ရင်းနီးသွားကြပါတော့တယ်။
မြလှိုင်ကလည်း
နွားကျောင်းထွက်ချိန်တိုင်း
မိန်းကလေးရဲ့ ယာခင်းဘက်ကို
သွားပြီး အဲဒီမိန်းကလေးနဲ့
တွေ့ဖြစ်တယ်။ ကြာတော့
မြလှိုင်တစ်ယောက် ဌေးမော်ကို
မေ့ပြီး အဲဒီမိန်းကလေးကို
ချစ်မိလာရော။ မြလှိုင် စိတ်ပြောင်းရင်လည်း
ပြောင်းစရာ။ အဲဒီမိန်းကလေးနဲ့
ဌေးမော်နဲ့က အစစအရာရာ ကွာနေတာကိုး။
ဌေးမော်က မာနကြီးတယ်။
သူ့ကိုလည်း သိပ်ဂရုစိုက်တာမဟုတ်ဘူး။
အဲတော့ ရုပ်လည်းချော
ဆက်ဆံရေးလည်းကောင်းတဲ့
တစ်ရွာသူဘက်ကို မြှားဦးလှည့်သွားတာလည်း
တကယ်တော့ မဆန်းကြယ်လှ။
တွေ့မြင်ရတာ ကြာလာတော့
မြလှိုင်နဲ့ အဲဒီမိန်းကလေးဟာ
ချစ်သူတွေ
ဖြစ်သွားကြပါတော့တယ်။
အ ခ န် း .. ၂ ..။
… မြလှိုင်ချစ်သူမှာ ထူးဆန်းတာ
တစ်ခုက အမြဲတမ်း အစိမ်းရောင်
ဝမ်းဆက် ဝတ်ထားတာပါပဲ။
ဆံပင်ကလည်း မြလှိုင်တွေ့ဖူးတဲ့
မိန်းမတွေထက် အဆပေါင်းများစွာရှည်တယ်။
အဲဒီရှည်လျားလှတဲ့ ဆံပင်တွေကိုလည်း
ဒီအတိုင်း ဖားလျားချထားတတ်တယ်။
မြလှိုင်တစ်ယောက်
အဲဒီမိန်းမနဲ့ ချစ်သူဖြစ်ပြီးကတည်းက
စိတ်ဟာ ပုံမှန်မဟုတ်တော့ဘူး။
နွားကျောင်းထွက်တဲ့အချိန်တွေက
အရင်ကထက်စောလာပြီး
ပြန်လာတဲ့အချိန်က နောက်ကျလာတယ်။
ကြာတော့ မြလှိုင်ကိုကြည့်ပြီး
အိမ်ကလူတွေက မသင်္ကာ
ဖြစ်လာကြတယ်။
အဲဒါနဲ့ တစ်နေ့ မြလှိုင် နွားကျောင်း
ထွက်ချိန် နောက်က
လိုက်ချောင်းကြတော့ မြလှိုင်ဟာ
တောထဲမှာ ထိုင်ပြီး တစ်ယောက်ယောက်နဲ့
စကားတွေ ပြောနေတာကို တွေ့မြင်
လိုက်ကြရပါတော့တယ်။
အိမ်ကိုရောက်တော့ မြလှိုင်ကို
“တောထဲမှာ ဘယ်သူနဲ့
စကားပြောနေလဲ”ဆိုပြီး
ဝိုင်းပြီးမေးကြပေမယ့်
မြလှိုင်က အမှန်အတိုင်းမပြော။
ဟိုဟိုဒီဒီလုပ်နေတယ်။
နောက်နေ့မှာပဲ ကောင်မလေးက
အတူနေရအောင်ဆိုပြီး
မြလှိုင်ကို သူနဲ့လိုက်ခဲ့ဖို့ ခေါ်ပါတော့တယ်။
မြလှိုင်ကလည်း မိန်းကလေးအိမ်ကို
အပြန်မလိုက်ချင်ဘူး
ငါ့အိမ်ကိုလိုက်ခဲ့ဆိုပြီး ပြန်ပြောတာပေါ့။
ဒါပေမဲ့ ကောင်မလေးက
မြလှိုင်အိမ်ကို ဘယ်တော့မှ
လိုက်မယ်လို့ မပြော။
မြလှိုင်ကိုပဲ သူနဲ့ လိုက်ခဲ့ဖို့ခေါ်တယ်။
နေ့တိုင်းလိုလိုပါပဲ။
မြလှိုင်ကလည်း မိန်းကလေးအိမ်ကို
အပြန်လိုက်ရမှာ ရှက်တာနဲ့
မလိုက်ဖြစ်။
တစ်ညမှာတော့ မြလှိုင်တစ်ယောက်
ကယောင်ကတမ်းတွေ ယောင်ပြီး
လျှောက်အော်နေပါတော့တယ်။
ကြောက်ကြောက်လန့်လန့်ပါပဲ။
အချိန်က ညဉ့်နက်သန်းခေါင်ယံ။
သူ ယောင်ပြီးအော်နေတဲ့
အသံကြောင့် အိမ်ကလူတွေ
လန့်နိုးလာကြပြီး သူ့ကို ပရိတ်ရေတွေတိုက်
ပြီး ဘာဖြစ်တာလည်းမေးကြတာပေါ့။
အဲတော့မှ မြလှိုင်က သူ့ကို
အိမ်ရှေ့ကနေ မိန်းမတစ်ယောက်
လာခေါ်နေကြောင်း အဲဒီမိန်းမဟာ
သူ့ချစ်သူဖြစ်ကြောင်း သူက
သူနဲ့ လိုက်နေဖို့ လာခေါ်ကြောင်း
အဖြစ်အပျက်အကုန်လုံးကို
ပြောပြတော့ မိဘများက စိုးရိမ်ပြီး
နားလည်းတတ်ကျွမ်းတဲ့
ဆရာတစ်ယောက်ဆီမှာ
လက်ဖွဲ့လေးတစ်ခု ပြုလုပ်ပြီး
မြလှိုင်ကို ဝတ်ပေးထားလိုက်ကြတယ်။
နောက်တစ်နေ့
မြလှိုင် နွားကျောင်းသွားတော့
သူ့ကောင်မလေးနဲ့ တွေ့ချိန်
ကောင်မလေးက
“အစ်ကို အစ်ကိုယ့်အနား
လာလို့မရလို့ ဘာတွေလုပ်ထားတာလဲဟင်”
အဲလိုမေးတော့ မြလှိုင်ကလည်း
“လက်ဖွဲ့လုပ်ထားတာပါ”
လို့ ပြန်ပြောလိုက်တယ်။
ကောင်မလေးက မျက်နှာငယ်လေးနဲ့
“ညီမကို ချစ်ရင်
အဲဒီလက်ဖွဲ့ကို ချွတ်ပြီး လွှင့်ပစ်လိုက်ပါလား
အစ်ကိုရေ ”
ကောင်းမလေးက အဲလိုပြောလိုက်တော့
တုံးအလွန်းတဲ့ မြလှိုင်က
သူ့ကောင်မလေးဟာ အစိမ်းမမှန်း
သိပြီးသွားပေမယ့် သူ့ကအချစ်တွေ
ပျက်မသွားသေးပဲ
ကောင်မလေးပြောတဲ့အတိုင်း
လက်ဖွဲ့ကို ချွတ်ပြီး လွှင့်ပစ်လိုက်မိတယ်။
အဲဒီအချိန်မှာပဲ
ကောင်မလေးက မြလှိုင်အနား
ရောက်လာပြီး သူ့ကို ခြေထောက်နဲ့
နောက်ပြန်ကန်ပါလေရော။
အဲတော့မှ မြလှိုင်တစ်ယောက်
ကြောက်ကြောက်လန့်လန့်နဲ့
အိမ်ကို တန်းပြေးတော့တယ်။
မြလှိုင်တစ်ယောက် အဲဒီနေ့ကတည်းက
ဖျားလိုက်တာ မသေရုံတမင်။
ကုလိုက်ရတဲ့ ဆေးကလည်း
ဆရာတွေ စုံလို့ ပါပဲ ။
. . . . . . . . . . . . . . . . . . . . . . . . .
ဟယ်ရီဇော်
အစ်မတစ်ယောက် Cb ကနေ လာပြောပြတဲ့
ဖြစ်ရပ်မှန် အဖြစ်အပျက် တစ်ခုကို
ဖတ်ကောင်းစေရန် ပြုပြင် ရေးသားထားတာ
ဖြစ်ပါတယ်။
Harry Zaw
” သတ္တဝါတွေ ကျန်းမာ ချမ်းသာကြပါစေ”